علا شهبة عن علاء عبد الفتاح

كنت محتاجة اكتب حاجة و عطلت "كعادتى" و سرحت فى مرات و امور اخرى قدرت اكتب فيها و اكتشفت ان نص المرات اللى احتجت اوثق فيها موقف او حدث او معلومة , اتشجعت اكتب بايعاز من علاء و مش بالضرورة خالص انه كان بيبقى قاصد يتعامل مع فوبيا الكتابه اللى عندى

و اكتشفت انه تسلسل منطقى

1- ليه عرف يساعدنى

2- ليه مهتم انى انا او غيرى نكتب, ليه بيكتب فبيبداء نقاش و تحصل معافرات و ساعات تفاهمات

3- تبعات ده و ما يصاحبه من التزامات و اتمان بيدفعها

فقلت اشرح نفسى و يمكن ابقى بشرح اللى لاقيتنى بفهمه عن صديقى المناضل المعتقل

*اولا , علاء كان بينجح فى تشجيعى لانه كان دايما بيسال سؤال محدد او يطلب توثيق معين و بدقه و كان بيبقى بيشجع من غير ما يراجع على اللى اتكتب او يقيمه فنيا

مثلا:

اكتبى عن الاتحاديه يا علا , انا بقولهم اخواتى اضربوا و هما مش فاهمين , اكتبى التفاصيل علشان يفهموا يمكن يدركوا انها جريمه

اكتبى عن موقفك من المحاكمة يا علا , لما انتى تقولى ان ده مش عدل و عن موقفك من الظروف اللى تضمن تحقيقه, احتمال انهم يسمعوكى اكبر و خصوصا انك شاهده على مشاركة الشرطة فى الجريمة

فى الحاله الاولى بيتكلم عن التواصل و الشرح لانصار مرسى و فى التانيه بيتكلم عن انصار السيسى , مش عن الاخوان و العسكر , مش عن الحكام لاء عن الناس.

*ثانيا بقى , لو تعرف علاء او حتى بس بتتابعه فى الاغلب دخلت معاه فى نقاش , لانه على عكس اغلبنا بيناقش الكل قريبين و بعاد مش بس بيكتب , و مبيهربش من مجادله و لا حتى لان الامر هيبقى اكيد بيستهلك منه وقت و مجهود ده على الاقل.

علاء و ده تقدر تتاكد منه لما يرجع حسابه انشالله, بيناقش المعلق على ما كتب على صفحته او على اللى نشره فى مدونته هو و منال او غرده.

بديهى تدرك ان علاء ببساطه و مباشرة و اخلاص , قضيته النقاش قضيته ان الناس تختلف فى هتتشارك القرار او المصير او المساحه ازاى فتتناقش لا تقتل بعض و لا تسجن

و بالتالى مهم عنده ان المعلومه توصل له و منه و من الكل و للكل

مهم عنده ان قيمه عن الانسانيه و حقوق الجميع تختار بفهم مش بس تفرضها قوانين.

مهم عنده ان الكل يقدر و بحريه يعبر عن نفسه

و عليه فمهم كان انه يبقى عضو فاعل او مساند لمبادرات زى مثلا تويت ندوة وويكى ثورة

و مهم عنده ان النقاش تتيسرله قنوات ووسائل (ده مثلا له علاقه بكونه "جيك" و بعمله )

و بالتالى برضو مهم عنده ان النقاش تبقى المعلومة فيه لها مصدر ومصداقيه

و مهم جدا الراى يبقى بتدعمه حجج و ما بيتتذوقش

*و ما بيتذوقش دى تاخدنا لثالثا , اغلب اللى بيستخدم فى الاعلام او بين الناس ضد علاء من تصريحاته , اغلبه بيتضح انه تعليق جوا نقاش على جزء معين من جدل ما ..الخ

دعبسه يعنى بتربص

بعضها تعليقات انتزعت من سياقها زى مثلا اللى قالوه فى الهيئه الاوروبيه اللى سحبت منه جايزة علشان قالت انه بيطالب بقتل اليهود او شىء من هذا القبيل و هو فى الحقيقه كان بيعلق فى تغريده او تويته فرعيه على الحق فى تقرير كل شعب مضطهد لوسيلته فى المقاومة , و على كون اسرائيل كيان احتلال,و مع اصدقاء مش محتاج ينوه لهم عن موقفه او موقف اغلبهم من العنف !

يمكن منال او منى يعرفوا يجيبوا رابط للبيان فتقروه كعينه و تمشوا معاه فى شرحه للاحداث و اثباتها

Mona Seif

Manal

وبعضها الاخر مواقف حادة و تعليقات ايوة هو مؤمن بمعناها و بيدافع عنها بس ماكنش بالضرورة -مراعاة مثلا لمشاعر بعض المجموعات- هيبادر و يصادم و يعلنها , لكن استطراد ما فى نقاش ما خلاها بقت تصريح.

و ايوه بعضها مواقف صادمة لكن هو مختار بشجاعه ووعى يعبر عنها و مقرر انها تنقل عنه و شارح معناها و حججه لانه فاهم انه هيتقرى و هيتسمع و عايز الناس تقرا و تسمع ده و مستعد للاشتباك معاه .

فيه زملا و اصدقاء من هلعهم علىه و على كل اللى بيتالم لسجن علاء و التنكيل بيه, بيعبروا ساعات عن غضبهم انه بيسهل على اعدائه صيده بصداميته. البعض بيقول انه تهور و البعض بيقول انه مثالية.

انا والله والله فكرت فى الموضوع و انا ماشية ورا التسلسل ده ووالله حاولت بشده افكر بموضوعيه من غير حمقه على صاحبى و اخويا او حمقه له.

اللى لاقيته و السرحان خلاه متجسد و مصاغ لاول مرة بشكل واضح هو انه بما ان علاء قضيته التحاجج , النقاش, السجال , نزاع الافكار للافكار ... فبالتالى منطقى اعتقد ان الديبلوماسيه تبقى بالنسبه له خيانه للامانه اللى بتقتضيها مناقشه جادة.

اوضح نفسى اكتر, انا بشوف مناضلين مخلصين جدا , قضيتهم و شاغلهم الشاغل هو التنظيم و من اسفل, تقديرهم ان الديبلوماسيه ;عدم التصادم مع المجتمع واجب علشان يعرفوا الاول يلاقوا مساحة عمل مشتركه و بعدين مع الثقه يبقى فيه طرح اوسع بعضهم بيعمل ده بابويه و البعض باحترام شديد. المهم علاء بما انه معنى بهدف تانى , فالرد الديبلوماسى المحسوب هياخر الوصول للهدف مش هيقربه.

يمكن تفسيركم مختلف يمكن دوافعه اوسع من ده, بس انا اكيد مش هدفى ابدا انى ابرر له, لانه ايا كانت الدوافع او النتائج مش ممكن ابدا يبقى فيه منطق او سبب وجيه لسجنه و بهدلته و حرمانه من وقته ووقت احبائه علشان "رأى"!

اللى موافقين على ان الرأى صاحبه بيتسجن دى ناس فاقدة المبداء و فاهمه المنطق و قابله تهمشه.

السلطات المختلفه اللى سجنته و بتحاكمة على التظاهر (و هما جم بمظاهرات على مظاهرات على اخرى ركبت على الاولانيه على غيرهم من المظاهرات برضو) معندهاش ضده دليل على اى من الترهات اللى بيرددها امثال لميس و عكاشه بامر منها.

السلطة طبيعى تكره المناضل اللى سلاحه الاساسى الحجه لانه السجال الحر يهدد هيمنتها على الجموع و افكارهم.

الرجعيين اللى مش سلطه او مبقوش او لسه بيسعوا برضو لا يمكن يتقبلوا علاء و اللى زيه لانهم بيضربوا بقوة فى منظومة السياسات و العادات و اللى بيدعوه من "الثوابت"و على اساسه بيسيطروا.

مش ممكن برضو تلاقى ارهابى بيحتفى بالسجال بالحجه و الدليل و المنطق و التعبير الحر.

علشان كده بيحيرنى انكم تختاروا تساندوا اى فئة من دول فى محاربه الفكره و المؤمنين بقوتها و بالمعرفه و كونها حق.

فاهمه ان بعضكم فى الاغلب مع فئه على التانيه, مش مع مبداء معين و حق للجميع حتى اعدائه, زى علاء و زمايل علاء و زميلاته اللى جوا السجن و اللى برا السجن و اللى بقم تحت الارض.

بس اغلبكم و اغلبنا مصلحتنا المباشرة و تحسن ظروف حياتنا و سلامنا و مستقبلنا و كرامتنا مش مع اى من السابق ذكرهم و اللى زيهم بل مشروط بالتغلب عليهم.

فبيقى ليه مش شايفين بوضوح انه فيه "أننه" ان السلطات اللى حاربت بعضها دى تبقى متفقه على ان استقرارها فى محاربه الفكر, و كلها من بعد بدء الثورة بتسجن علاء و بالتحديد علاء مع ضحايا تانيين طبعا!

بستغرب ان شخص يبقى كل ادائه بيثبت انه بيدافع عن قدرة الجميع على الفهم و التقرير و المشاركه و حقهم فى ده بحرية فيبقى "الكل" دول منهم كتير موافقين انه يسلب حريته و برضاهم يدوا لده شرعيه !

مش متوغوشين ان النيابه فى جلسه فى محاكمة الشورى متلاقيش فى اجهزة الكمبيوتر بتاعه و بتاع منال -اللى سرقتهم الشرطه- حاجه تعرضها غير فيديوهات خاصه لابنه و مراته !

مفيش فئران بتلعب فى عبكم من فكرة ان تجار السلاح و الفساد بتوع مبارك زى حسين سالم اتسابوا يهربوا برا البلد (بقصد زمان يعنى دلوقتى بيستقبلوا بترحاب) .

غزلان عراب الاتحاديه القيادى الاخوانى و حسن مالك بتاع فلوسهم , يبقوا احررا و مبيتحاكموش على جرايمهم او حتى بيعتقلوا ظلم و تكدير زى غيرهم , لكن علاء و كتير تانيين حتى لما بيبقوا برا السجن بيتمنعوا من السفر ؟

ليه الشاطر بيطلع اوامر من جوا السجن و علاء مش عارف يدخل كتاب يقراه ؟

مش برضو علشان الكلمة مبتعرفش حدود و الحجه لها هيبتها و لان السجن بيعرف ياخر بكرا و يكتم الفكره؟!