كل سنة وانت طيب يا علاء

- تحب تعمل كارت لعلاء عشان النهاردا عيد ميلاده؟
- اه طبعا بس هنديهوله ازاي؟ 
- منال بتعرف تشوفه هي هتدخلهوله
- اشمعنى منال بتعرف تشوفه واحنا لا؟
- منال مراته يعني Family مامته وأخواته ومراته واولاده يبقوا فاميلي
- واحنا مش فاميلي؟ 
- احم، احنا فاميلي بس كبيرة شوية. هماsmall family
- هو ليه علاء كل شوية يخش السجن؟ 
- ...
- نورا، ليه كل ما علاء يخرج يخش السجن تاني؟ 
- عشان علاء شجاع، والبوليس وحش. علاء بيحاول يصلح شوية حاجات عشان لما انت وخالد تكبروا تلاقوها احسن شوية.
- بس هو مش لازم يبقى شجاع. بلاش شجاع دي وبلاش مظاهرات.
- هو اختار يبقى شجاع. كل واحد من حقه يختار ويغير اختياره لو عاوز.
- هو اصلا كان عاوز ايه؟
- كان رايح مجلس الشعب عشان المجلس هو اللي بيوافق القانون، عشان يقول للمجلس ان من حق الناس تعمل مظاهرات من غير البوليس ما يقبض عليها. بس البوليس قبض عليه وكذب، راح للقاضي قاله إهئ إهئ علاء ضربني وخد اللاسلكي بتاعي. 
- بس دي تبقى كذبة!
- آه ماهو عشان كدا بنقول انه بوليس وحش
- طب وهو القاضي مش بيعرف الكذابين؟
- ماهو القاضي كمان كان وحش
- ليه القاضي طلع وحش؟ يعني هو أتولد وحش وباباه ضربه ولا ايه؟ 
- محدش بيتولد وحش. هو اختار يبقى وحش. 
- في نينجاجو لورد جارمادون طلع وحش عشان فيه تعبان عضه
- ولويد كان وحش عشان اختار يبقى وحش
- لا لويد كان وحش لانه طلع لقى باباه وحش وكان عاوز يطلع زي باباه. 
- اه عندك حق. فاكر مبارك؟
- اه طبعا
- هو فيه حاجات كتير عرفنا انها بايظة وهو موجود. منها موضوع القضاة دا. بس هو باظ اكتر جداً دالوقتي.

الكارت: علاء ومراد في منطاد هيخرجوا بيه من السجن. القلوب الحمرا كان تحتها كلمة بالون وخبيناها عشان البوليس الغبي يدخل الكارت.